སྐལ་བཟང་མགྲོན་པོ།

མུན་པ་མེ་ཡིས་ཟས་པའི་རྗེས་ཤུལ་དུ།།
སྙིང་ཁར་དྲོད་ཀྱིས་བྱིན་པའི་ཚོར་བས་བཟུང་།།
ན་ཟུག་གླུ་རུ་བཞེངས་པའི་སྙན་ངག་པ།།
འོད་ཀྱི་ལམ་བུ་ཞིག་གི་སྣེ་ལ་འཇུས།།

རྟོག་བཏགས་འཚོ་བའི་རི་གྲོང་དམར་པོ་དེར།།
ཡིད་ཆེས་འཇའ་རིས་གསལ་བའི་རླུང་རྟ་བཙུགས།།
ཆུ་བུར་རྡོག་པོ་ཟུང་གི་འཕྲུལ་འདེགས་ཀྱིས།།
མེ་ཏོག་བསུང་ཞིམ་སྣོམ་ལ་སྨོན་པ་སྒྲིག།

སོར་མོའི་རྒྱུད་ལ་འཁྲུངས་པའི་དབྱངས་རྟ་ཞིག།
སྤྲིན་པའི་རླབས་ཀྱིས་བསྐྱོམ་སྟེ་སྙིང་ལ་ལྷུང་།།
བྱུ་རུའི་སྐས་རྐང་འགྲིམ་པའི་དབྱངས་ཅན་མ།།
དཔག་ཚད་བྱེ་བའི་ཁྱོན་ཐོལ་གྱིས་འཕགས།།

ཆར་སིམ་བརླན་གྱིས་བཟུང་བའི་ལ་འདབ་ཅིག།
བྱེ་མའི་ཐང་ལ་ལྷུང་བའི་རྟེན་འབྱུང་གིས།།
རླུང་གིས་ཤུ་སྒྲ་འབྱིན་པའི་ཡུལ་ཁམས་ཤིག།
ལྗང་ལོའི་རལ་བ་འཛུམ་པའི་ཞིང་དུ་བསྒྲུབས།།

དྲོད་ཀྱིས་བྱིན་པའི་ཚེ་སྲོག་ལྗང་ཁུ་ཞིག།
འདི་ན་གཉོམ་དུང་མགོ་བོ་དུད་དེ་ལྷག།
གསེར་མདོག་སྟོན་གྱི་སྙེ་མ་རེ་རེ་ཡང་།།
མི་གསལ་གབ་པའི་ཚུལ་གྱིས་གད་མོ་དགོད།།

མཐའ་དང་མགོ་མཇུག་བྲལ་བ་འོ་མའི་མཚོ།།
ངང་བའི་རྩེད་འཇོར་ཆགས་དེ་རླབས་ཕྲེང་གཡོ།།
མུ་ཏིག་བལྟར་ལ་བརྒྱུས་པའི་ཁྲུང་ཁྲུང་ཚོགས།།
སྟོན་གྱི་བུ་མོ་བསུ་ཕྱིར་ལྷོ་རུ་འཕུར།།

དཀར་མཛེས་དུང་ལ་སྐྱེས་པའི་མེ་ཏོག་ཅིག།
དགྱེས་འཛུམ་སོར་རྩེར་ལེན་པའི་སྒེག་བག་གིས།།
མྱ་ངན་མཐའ་རུ་བྱེད་པའི་དབྱངས་ཅན་མ།།
སེམས་ཀྱི་མགྲོན་དུ་ཕེབས་འདི་སྐལ་བ་བཟང་།།