Sunday, December 20, 2009




Thursday, December 17, 2009




Posted by Picasa
Posted by Picasa
Posted by Picasa









































Tuesday, November 24, 2009

སྐལ་བཟང་མགྲོན་པོ།

མུན་པ་མེ་ཡིས་ཟས་པའི་རྗེས་ཤུལ་དུ།།
སྙིང་ཁར་དྲོད་ཀྱིས་བྱིན་པའི་ཚོར་བས་བཟུང་།།
ན་ཟུག་གླུ་རུ་བཞེངས་པའི་སྙན་ངག་པ།།
འོད་ཀྱི་ལམ་བུ་ཞིག་གི་སྣེ་ལ་འཇུས།།

རྟོག་བཏགས་འཚོ་བའི་རི་གྲོང་དམར་པོ་དེར།།
ཡིད་ཆེས་འཇའ་རིས་གསལ་བའི་རླུང་རྟ་བཙུགས།།
ཆུ་བུར་རྡོག་པོ་ཟུང་གི་འཕྲུལ་འདེགས་ཀྱིས།།
མེ་ཏོག་བསུང་ཞིམ་སྣོམ་ལ་སྨོན་པ་སྒྲིག།

སོར་མོའི་རྒྱུད་ལ་འཁྲུངས་པའི་དབྱངས་རྟ་ཞིག།
སྤྲིན་པའི་རླབས་ཀྱིས་བསྐྱོམ་སྟེ་སྙིང་ལ་ལྷུང་།།
བྱུ་རུའི་སྐས་རྐང་འགྲིམ་པའི་དབྱངས་ཅན་མ།།
དཔག་ཚད་བྱེ་བའི་ཁྱོན་ཐོལ་གྱིས་འཕགས།།

ཆར་སིམ་བརླན་གྱིས་བཟུང་བའི་ལ་འདབ་ཅིག།
བྱེ་མའི་ཐང་ལ་ལྷུང་བའི་རྟེན་འབྱུང་གིས།།
རླུང་གིས་ཤུ་སྒྲ་འབྱིན་པའི་ཡུལ་ཁམས་ཤིག།
ལྗང་ལོའི་རལ་བ་འཛུམ་པའི་ཞིང་དུ་བསྒྲུབས།།

དྲོད་ཀྱིས་བྱིན་པའི་ཚེ་སྲོག་ལྗང་ཁུ་ཞིག།
འདི་ན་གཉོམ་དུང་མགོ་བོ་དུད་དེ་ལྷག།
གསེར་མདོག་སྟོན་གྱི་སྙེ་མ་རེ་རེ་ཡང་།།
མི་གསལ་གབ་པའི་ཚུལ་གྱིས་གད་མོ་དགོད།།

མཐའ་དང་མགོ་མཇུག་བྲལ་བ་འོ་མའི་མཚོ།།
ངང་བའི་རྩེད་འཇོར་ཆགས་དེ་རླབས་ཕྲེང་གཡོ།།
མུ་ཏིག་བལྟར་ལ་བརྒྱུས་པའི་ཁྲུང་ཁྲུང་ཚོགས།།
སྟོན་གྱི་བུ་མོ་བསུ་ཕྱིར་ལྷོ་རུ་འཕུར།།

དཀར་མཛེས་དུང་ལ་སྐྱེས་པའི་མེ་ཏོག་ཅིག།
དགྱེས་འཛུམ་སོར་རྩེར་ལེན་པའི་སྒེག་བག་གིས།།
མྱ་ངན་མཐའ་རུ་བྱེད་པའི་དབྱངས་ཅན་མ།།
སེམས་ཀྱི་མགྲོན་དུ་ཕེབས་འདི་སྐལ་བ་བཟང་།།
སེམས་ཀྱི་འཁུན་སྒྲ།
གཞོན་པའི་ན་ཕྲ་དུས་ཀྱི་རུམ་ནས་ཟད་སོང་།།
གདོང་གི་ཁ་དོག་སྤུ་དང་གཉེར་མས་གང་སོང་།།
ན་སྤང་མེ་ཏོག་འཐུ་བའི་བྱིས་པ་ཆུང་ཆུང་།།
ལང་ཚོའི་ཚིགས་རིས་འཁྱོག་པའི་རྒས་འཁོག་གྲུབ་སོང་།།

ཁ་མཚར་ཀུ་རེ་བྱེད་པའི་སྤྱོད་སྟངས་དེ་ཡིས།།
མི་སེམས་སྐྱིད་ལ་སྐུར་བའི་འཚོ་བ་སྣུམ་པོ།།
ལོ་ཟླའི་ཆར་རླུང་རྩུབ་མོས་རལ་བའི་ཤུལ་དུ།།
ཁེར་རྐྱང་གདོང་ལ་སྐྱོ་བའི་སྨུག་ཅིག་འཐིབ་འདུག།

ན་ཟླའི་སེར་ཆེན་མེ་ཏོག་ལྡེམ་པའི་ཚལ་དུ།།
རང་སྣང་གླུ་རུ་བཞེངས་པའི་འགྱུར་ཁུགས་རེ་ཡང་།།
སྨྲེང་བའི་ཨུ་ཤུར་གྱུར་བའི་དབྱངས་རྟར་བརྫིས་ནས།།
ལྷིང་འཇགས་འཚོ་བའི་ཁ་ལ་སྐྱུར་རྩིར་བབ་སོང་།།

གྱེས་གདུང་མིག་ཆུས་བྲིས་པའི་ལམ་བུ་ཕྲ་མོ།།
ལས་ཀྱི་སྣེ་མོར་འཇུས་པའི་དུས་ཚིགས་དེ་ནས།།
སྟག་ཤར་འབྲོང་སྙིང་ཅན་གྱི་སྒྱུ་མའི་མཐིལ་དུ།།
ཤུར་ཤུར་རྒྱུ་བའི་ཁ་བ་འབབ་མགོ་བརྩམས་སོང་།།

གནས་སའི་ཁོར་ཡུག་རྫོབ་པོར་ཁ་དོག་མི་འདུག།
འགྲོགས་སའི་མི་ལ་བོད་པའི་རྩམ་དྲི་མི་བྲོ།།
ར་མིན་ལུག་མིན་ལྟ་བའི་ཁ་ཕྱོགས་དེ་ཡིས།།
གདུང་བའི་ཁ་ལ་གདུང་བ་སྣོན་མར་བརྩེགས་སོང་།།

ཐོས་པའི་གཏམ་ལ་ཚྭ་དང་སྒོག་པས་ཁྱབ་འདུག།
མཐོང་བའི་ཁ་དོག་མདངས་དང་འོད་ཀྱིས་སྟོང་འདུག།
ཕྱི་རོལ་དགྲ་རུ་ལངས་པའི་སྣང་ཚུལ་དེ་ཡིས།།
གདོང་གི་རྒས་རིས་ཟབ་ནས་ཟབ་དུ་ཕྱིན་སོང་།།

སེམས་ཀྱིས་འཕྲུལ་ལ་བཞེངས་པའི་ཞིང་ཁམས་སེར་བོ།།
མེ་ཏོག་ནམ་ཟླས་བཏང་བའི་དགུན་ལ་བཏབ་འདུག།
དད་དམ་སྨོན་ལམ་གཙང་མའི་མིག་ཆུ་དེ་ཡང་།།
ཡིད་ཆད་མེ་ལ་གཞུས་དེ་སེམས་ནས་སྐམ་སོང་།།

ཨུ་ཚུགས་གཡག་ལ་འཕྱར་བྱེད་ལྕག་གི་ཁྲིམས་ཆད།།
ཀླད་མེད་བྱིས་བར་བཏབ་པའི་ངང་ཚུལ་དེ་ཡིས།།
འཚེ་མེད་ཞི་བར་གྲགས་པའི་ཆོས་ཀྱི་བཀའ་ཁྲིམས།།
མི་སེམས་དམར་གསོད་བྱེད་པའི་གཤེད་མར་གོ་སོང་།།

གཡོ་སྒྱུ་འཛུམ་རིས་གསལ་བའི་མིག་ཟུང་རྣོན་པོས།།
གཞན་སྐྱོན་ཁབ་མིག་འཚོལ་བའི་སྲིན་བྱ་སྐོར་ཅིག།
ཉིན་སྐུང་མཚན་རྒྱུའི་ལས་ལ་བཀའ་རྒྱས་བཏབ་པས།།
འགྲོ་འདུག་སྤྱོད་པའི་འཚོ་བར་བདེ་བློ་མི་འདུག།

རང་བདེ་གཞན་ཕམ་བློ་ཡི་འཁྱེར་སྟངས་བཙན་པོས།།
མི་སེམས་བྲན་དུ་བྱེད་པའི་སྤྱི་ཚོགས་འདི་རུ།།
བློ་གཏད་ཆུ་ཤིང་སྙིང་བོའི་དཔེ་རུ་སོང་བས།།
སླད་མེད་མཛའ་གཅུགས་ཟེར་བ་རྨི་ལམ་ལོངས་སྤྱོད།།

བརྩེ་ལྡན་མ་ལོའི་སྙིང་གི་སྲོག་དུ་གྲུབ་པའི།།
འབྲོང་གཡག་དར་མའི་རྒྱུད་དུ་འཁྲུངས་བའི་བུ་ཞིག།
འཁོར་བས་བརྙས་བཅོས་ཡང་དང་བསྐྱར་དུ་བྱས་པས།།
སེམས་ཀྱི་འཁུན་སྒྲ་མ་བཟོད་ཕྱི་ལ་ཤོར་སོང་།།

Monday, August 24, 2009

སེམས་པ་སེམས་པས་བརྐུས་པའི་ལོ་དང་ཟླ་བ།།
རླུང་དང་ཁ་བར་གྱུར་ནས་སེམས་ལ་བབ་སོང་།།
རེ་བ་རེ་བར་ཐིམ་བའི་རྨི་ལམ་རིང་མོ།།
ཆུ་བོའི་གཞུང་ལ་འདྲེས་ནས་ཕར་ལ་བཞུར་སོང་།།

ཁ་པར་ཆུང་ཆུང་དེ་ཡི་འརྡ་སྣེ་བརྒྱུད་ནས།།
སེམས་ཀྱི་ཚོར་བ་གླུ་རུ་ལེན་འདོད་སྐྱེས་ཀྱང་།།
ངོ་ཚའི་ན་བུན་འཐིབས་པའི་གཤིས་ལུགས་ཤིག་གིས།།
སྙིང་གི་གླུ་སྐད་མགྲིན་པའི་ལམ་ནས་འགག་འགྲོ།།

ཚོར་བ་ཆུ་རུ་གདུ་བའི་སེམས་ཀྱི་རྒྱལ་མོས།།
མི་ཡི་གཤིས་ཀ་དང་དུ་ལོངས་ཞེས་སྨྲས་ཀྱང་།།
མི་ཁའི་མཚོན་ཆར་ཞེད་པའི་ངང་ཚུལ་དེ་ཡིས།།
སྣང་བ་བག་ལ་ཞུ་བའི་གདམས་ངག་བསྟན་ཡོང་།།

ཚེ་ཡི་ཕྲེང་བར་གོམས་པའི་ཤུགས་རྐྱེན་ཞིག་གིས།།
རྟོག་བཏགས་འཕྲུལ་གྱི་སྣང་བ་སེམས་ངོར་གྲུབ་སོང་།།
ལས་ཀྱི་བསྐོས་ཐང་དེ་ཡི་ཐིགས་རིས་བསམ་ནས།།
སེམས་པ་བདག་གིར་བཟུང་ཡང་རི་ལ་ཤོར་འགྲོ།།
ཚོར་བ་རྩུབ་མོ།

རྩོམ་པ་པོ་ཐེའུ་རིང་ལ།

རྣོ་ལྕགས་ཀྱིས་གྲུབ་པའི་སེམས་པ་དམར་པོ།།
མེ་དཔུང་གིས་བཞེངས་པའི་འཚོ་བར་བཏབ་ནས།།
ཁྲག་ནག་གིས་བྲིས་པའི་སེམས་ཀྱི་སྙན་ངག།།
འཇིགས་བྲལ་གྱི་ཀློང་ནས་སྤོབས་པས་བླངས་སོང་།།

གཡོ་སྒྱུ་ཡིས་བཀབ་པའི་སེམས་ཀྱི་གཤིས་ཀ།།
ཕ་མ་ཡིས་གནང་བའི་ངང་ཚུགས་མིན་སྟབས།།
ཨུ་ཚུགས་ལ་བརྒྱུས་བའི་གླེན་རྟགས་ཚ་བོས།།
སུ་ཞིག་གི་བདེ་སྡུག་སེམས་ལ་ཉར་ཡོད།།

ཁུ་ཁྲག་ལས་གྲུབ་པའི་དར་མའི་ལང་ཚོར།།
ལྕགས་ནག་གིས་བྲབ་པར་སེར་སྣ་མེད་ཀྱང་།།
ན་ཆུང་གི་རོགས་ལོས་སྒུག་ཡོད་བསམ་ན།།
དམར་སྨུག་གི་སྙིང་ལ་གས་ཆག་མེད་དམ།།

མུན་ནག་ལ་བཅོལ་བའི་ན་ཟུག་ལྕི་མོ།།
ཕྲ་ཆུང་གི་མིག་ལས་རེ་བས་ཀློག་བཞིན།།
མྱ་ངན་གྱིས་གཟེང་བའི་སྐྲ་ལོ་རིང་བོ།།
ཚེར་ཕུང་གི་གཟིམ་མལ་གང་དུ་འཐོར་ཡོད།།

ཡབ་མེས་ཀྱིས་གནང་བའི་རུས་རྐང་སྲ་མོ།།
ཁྱི་སྤྱང་གི་ཁ་རུ་མཁྲེགས་པ་བདེན་ཡང་།།
སྙིང་སྟོབས་ཀྱིས་གཏར་བའི་ཁྲག་གི་མཆོད་འབུལ།།
འདྲེ་སྲིན་གྱི་དཔུང་བར་བཤམས་དོན་ཅི་ཡིན།།

བརྩེ་བའི་སྦྲང་ཆང་།

སེམས་ཀྱི་སྣོད་ལ་ཕབ་པའི་བརྩེ་བའི་སྦྲང་ཆང་།།
མགྲིན་པའི་བུ་ག་བརྟོལ་ནས་ཕྱི་ལ་ཤོར་སོང་།།
དམ་ཚིག་མདུད་པ་བོར་བའི་སེམས་ཀྱི་སྡོམ་པ།།
ལང་ཚོའི་མཛེས་རིས་དེ་ཡི་ཁ་ནས་ཟད་སོང་།།

གཞོན་པའི་ན་ཚོད་སྨིན་པའི་བྲང་གི་ནུ་མ།།
དམར་སེར་ངུར་སྨྲིག་གོས་ཀྱི་སྤྲིན་པས་བཀབ་ཀྱང་།།
བྱམས་སེམས་འོད་ཀྱིས་བཞེངས་པའི་གདོང་གི་འཛུམ་རིས།།
སུས་ཀྱང་མ་བསྒྲིབས་བདག་གི་སེམ་ན་གསལ་འདུག།

ལས་དང་བྱ་བའི་བཀོད་སྒྲིག་སོ་སོ་ཡིན་སྟབས།།
བྲང་གི་འཇམ་ཤར་གླན་པར་བར་ཐག་ཆོད་ཀྱང་།།
འཕྲིན་དང་ཁ་པར་དེ་ཡི་བརྡ་ལམ་བརྒྱུད་ནས།།
སེམས་ཀྱི་བརྩེ་བ་ཁྱེད་ཀྱི་བྲང་ལ་སྦྱར་ཡོད།།

སྐྱེས་ཡུལ་ལུང་བ་མི་གཅིག་ཞིང་ཆེན་ཁ་ཁ།།
འཚོ་སའི་གནས་ཡུལ་མི་གཅིག་ལྷོ་དང་བྱང་སྣེ།།
ཡིན་ཡང་ཐེངས་གཅིག་འཕྲད་པའི་བསྐོས་ཐེངས་དེ་ཡིས།།
སེམས་དང་སེམས་པའི་རྒྱུན་ཐག་གཅིག་ལ་འདྲེས་ཡོད།།

འཕྲད་འདོད་སེམས་ཀྱི་འདོད་པའི་བཀའ་ལུང་བཙན་བོས།།
གོམ་པའི་འདེགས་འཇོག་ཕར་དང་ཕར་ལ་བསྒྱུར་ཀྱང་།།
མི་ཁའི་མཚོན་རྩེ་གཟེང་བའི་ཁོར་ཡུག་རྫོབ་པོས།།
སྙིང་གི་འདུན་པ་ཕྱིར་དང་ཕྱིར་ལ་བསྣུར་ཡོང་།།

མི་ལ་མི་དང་མཚམས་པའི་སེམས་གཤིས་ཡོད་ཕྱིར།།
འཇིག་རྟེན་བརྩེ་བའི་ཕྱོགས་ལ་དུངས་ཀ་ལོས་ཡོད།།
སར་གནས་སེམས་དཔར་འབོད་པའི་ཚངས་དབྱངས་རྒྱ་མཚོ།།
ལམ་ཐུག་བྱམས་པར་དུང་བའི་ཚུལ་ལ་ལྟོས་དང་།།

གདོད་ནས་རང་ལ་མངའ་བའི་སེམས་ཀྱི་གཤིས་ཀར།།
ཚུལ་འཆོས་མུན་བས་བཀབ་ཀྱང་ཕན་འབྲས་ཅི་ཡོད།།
རྫུན་གྱི་ཨུ་ཁུང་དེ་ལ་ཡ་ཕུག་ཐུང་ཞེས།།
འཇིག་རྟེན་མི་ཡི་དཔེ་རུ་གྲགས་པ་མིན་ནམ།།

སེམས་ཀྱི་སྙན་ངག་དུང་བའི་གླུ་རུ་ལེན་པ།།
ངག་ཀྱལ་ཡིན་ཞེས་དམ་པའི་གསུངས་ལས་བཤད་ཀྱང་།།
ཚོར་སྣང་དུར་སྦས་བྱ་བའི་བརྟུལ་ཞུགས་དེ་ལ།།
འདོད་པའི་ཡི་ག་ཆད་འདི་བདག་གི་རང་གཤིས།།

ཆོས་ཁྲིམས་ལྕགས་ཀྱིས་སྲུང་བའི་ཚོགས་གྲལ་དེ་རུ།།
དབུ་ལོ་ཀྱག་ཀྱོག་མ་བྱས་དྲང་བོར་གནས་ཀྱང་།།
གཟིགས་བྲལ་སེམས་ལ་མངའ་བའི་སྨོན་ལམ་གཙང་མ།།
སྨན་ཆུང་བུ་མོ་དེ་ཡི་མགྲིན་པར་འཁྱུད་ཡོད།།

ངང་ཚུགས་རང་ཚུགས་བྲལ་བའི་མི་རྐྱང་སེམས་འདི།།
བརྩེ་བའི་ལྕགས་ཐུར་གཏིང་དུ་ཟུག་པའི་རྟགས་རེད།།
གཡས་གཟུར་གཡོན་གཟུར་མེད་པའི་སྙིང་གི་འཕྲིན་འདི།།
སྒྲོལ་མས་སེམས་པ་བརྐུས་པ་བདེན་པའི་རྟགས་རེད།།


Saturday, August 8, 2009



Friday, August 7, 2009






Sunday, June 21, 2009

Friday, June 5, 2009



Sunday, May 31, 2009


Thursday, May 21, 2009


Sunday, April 12, 2009