སྐལ་བཟང་མགྲོན་པོ།

མུན་པ་མེ་ཡིས་ཟས་པའི་རྗེས་ཤུལ་དུ།།
སྙིང་ཁར་དྲོད་ཀྱིས་བྱིན་པའི་ཚོར་བས་བཟུང་།།
ན་ཟུག་གླུ་རུ་བཞེངས་པའི་སྙན་ངག་པ།།
འོད་ཀྱི་ལམ་བུ་ཞིག་གི་སྣེ་ལ་འཇུས།།

རྟོག་བཏགས་འཚོ་བའི་རི་གྲོང་དམར་པོ་དེར།།
ཡིད་ཆེས་འཇའ་རིས་གསལ་བའི་རླུང་རྟ་བཙུགས།།
ཆུ་བུར་རྡོག་པོ་ཟུང་གི་འཕྲུལ་འདེགས་ཀྱིས།།
མེ་ཏོག་བསུང་ཞིམ་སྣོམ་ལ་སྨོན་པ་སྒྲིག།

སོར་མོའི་རྒྱུད་ལ་འཁྲུངས་པའི་དབྱངས་རྟ་ཞིག།
སྤྲིན་པའི་རླབས་ཀྱིས་བསྐྱོམ་སྟེ་སྙིང་ལ་ལྷུང་།།
བྱུ་རུའི་སྐས་རྐང་འགྲིམ་པའི་དབྱངས་ཅན་མ།།
དཔག་ཚད་བྱེ་བའི་ཁྱོན་ཐོལ་གྱིས་འཕགས།།

ཆར་སིམ་བརླན་གྱིས་བཟུང་བའི་ལ་འདབ་ཅིག།
བྱེ་མའི་ཐང་ལ་ལྷུང་བའི་རྟེན་འབྱུང་གིས།།
རླུང་གིས་ཤུ་སྒྲ་འབྱིན་པའི་ཡུལ་ཁམས་ཤིག།
ལྗང་ལོའི་རལ་བ་འཛུམ་པའི་ཞིང་དུ་བསྒྲུབས།།

དྲོད་ཀྱིས་བྱིན་པའི་ཚེ་སྲོག་ལྗང་ཁུ་ཞིག།
འདི་ན་གཉོམ་དུང་མགོ་བོ་དུད་དེ་ལྷག།
གསེར་མདོག་སྟོན་གྱི་སྙེ་མ་རེ་རེ་ཡང་།།
མི་གསལ་གབ་པའི་ཚུལ་གྱིས་གད་མོ་དགོད།།

མཐའ་དང་མགོ་མཇུག་བྲལ་བ་འོ་མའི་མཚོ།།
ངང་བའི་རྩེད་འཇོར་ཆགས་དེ་རླབས་ཕྲེང་གཡོ།།
མུ་ཏིག་བལྟར་ལ་བརྒྱུས་པའི་ཁྲུང་ཁྲུང་ཚོགས།།
སྟོན་གྱི་བུ་མོ་བསུ་ཕྱིར་ལྷོ་རུ་འཕུར།།

དཀར་མཛེས་དུང་ལ་སྐྱེས་པའི་མེ་ཏོག་ཅིག།
དགྱེས་འཛུམ་སོར་རྩེར་ལེན་པའི་སྒེག་བག་གིས།།
མྱ་ངན་མཐའ་རུ་བྱེད་པའི་དབྱངས་ཅན་མ།།
སེམས་ཀྱི་མགྲོན་དུ་ཕེབས་འདི་སྐལ་བ་བཟང་།།

སེམས་ཀྱི་འཁུན་སྒྲ།
གཞོན་པའི་ན་ཕྲ་དུས་ཀྱི་རུམ་ནས་ཟད་སོང་།།
གདོང་གི་ཁ་དོག་སྤུ་དང་གཉེར་མས་གང་སོང་།།
ན་སྤང་མེ་ཏོག་འཐུ་བའི་བྱིས་པ་ཆུང་ཆུང་།།
ལང་ཚོའི་ཚིགས་རིས་འཁྱོག་པའི་རྒས་འཁོག་གྲུབ་སོང་།།

ཁ་མཚར་ཀུ་རེ་བྱེད་པའི་སྤྱོད་སྟངས་དེ་ཡིས།།
མི་སེམས་སྐྱིད་ལ་སྐུར་བའི་འཚོ་བ་སྣུམ་པོ།།
ལོ་ཟླའི་ཆར་རླུང་རྩུབ་མོས་རལ་བའི་ཤུལ་དུ།།
ཁེར་རྐྱང་གདོང་ལ་སྐྱོ་བའི་སྨུག་ཅིག་འཐིབ་འདུག།

ན་ཟླའི་སེར་ཆེན་མེ་ཏོག་ལྡེམ་པའི་ཚལ་དུ།།
རང་སྣང་གླུ་རུ་བཞེངས་པའི་འགྱུར་ཁུགས་རེ་ཡང་།།
སྨྲེང་བའི་ཨུ་ཤུར་གྱུར་བའི་དབྱངས་རྟར་བརྫིས་ནས།།
ལྷིང་འཇགས་འཚོ་བའི་ཁ་ལ་སྐྱུར་རྩིར་བབ་སོང་།།

གྱེས་གདུང་མིག་ཆུས་བྲིས་པའི་ལམ་བུ་ཕྲ་མོ།།
ལས་ཀྱི་སྣེ་མོར་འཇུས་པའི་དུས་ཚིགས་དེ་ནས།།
སྟག་ཤར་འབྲོང་སྙིང་ཅན་གྱི་སྒྱུ་མའི་མཐིལ་དུ།།
ཤུར་ཤུར་རྒྱུ་བའི་ཁ་བ་འབབ་མགོ་བརྩམས་སོང་།།

གནས་སའི་ཁོར་ཡུག་རྫོབ་པོར་ཁ་དོག་མི་འདུག།
འགྲོགས་སའི་མི་ལ་བོད་པའི་རྩམ་དྲི་མི་བྲོ།།
ར་མིན་ལུག་མིན་ལྟ་བའི་ཁ་ཕྱོགས་དེ་ཡིས།།
གདུང་བའི་ཁ་ལ་གདུང་བ་སྣོན་མར་བརྩེགས་སོང་།།

ཐོས་པའི་གཏམ་ལ་ཚྭ་དང་སྒོག་པས་ཁྱབ་འདུག།
མཐོང་བའི་ཁ་དོག་མདངས་དང་འོད་ཀྱིས་སྟོང་འདུག།
ཕྱི་རོལ་དགྲ་རུ་ལངས་པའི་སྣང་ཚུལ་དེ་ཡིས།།
གདོང་གི་རྒས་རིས་ཟབ་ནས་ཟབ་དུ་ཕྱིན་སོང་།།

སེམས་ཀྱིས་འཕྲུལ་ལ་བཞེངས་པའི་ཞིང་ཁམས་སེར་བོ།།
མེ་ཏོག་ནམ་ཟླས་བཏང་བའི་དགུན་ལ་བཏབ་འདུག།
དད་དམ་སྨོན་ལམ་གཙང་མའི་མིག་ཆུ་དེ་ཡང་།།
ཡིད་ཆད་མེ་ལ་གཞུས་དེ་སེམས་ནས་སྐམ་སོང་།།

ཨུ་ཚུགས་གཡག་ལ་འཕྱར་བྱེད་ལྕག་གི་ཁྲིམས་ཆད།།
ཀླད་མེད་བྱིས་བར་བཏབ་པའི་ངང་ཚུལ་དེ་ཡིས།།
འཚེ་མེད་ཞི་བར་གྲགས་པའི་ཆོས་ཀྱི་བཀའ་ཁྲིམས།།
མི་སེམས་དམར་གསོད་བྱེད་པའི་གཤེད་མར་གོ་སོང་།།

གཡོ་སྒྱུ་འཛུམ་རིས་གསལ་བའི་མིག་ཟུང་རྣོན་པོས།།
གཞན་སྐྱོན་ཁབ་མིག་འཚོལ་བའི་སྲིན་བྱ་སྐོར་ཅིག།
ཉིན་སྐུང་མཚན་རྒྱུའི་ལས་ལ་བཀའ་རྒྱས་བཏབ་པས།།
འགྲོ་འདུག་སྤྱོད་པའི་འཚོ་བར་བདེ་བློ་མི་འདུག།

རང་བདེ་གཞན་ཕམ་བློ་ཡི་འཁྱེར་སྟངས་བཙན་པོས།།
མི་སེམས་བྲན་དུ་བྱེད་པའི་སྤྱི་ཚོགས་འདི་རུ།།
བློ་གཏད་ཆུ་ཤིང་སྙིང་བོའི་དཔེ་རུ་སོང་བས།།
སླད་མེད་མཛའ་གཅུགས་ཟེར་བ་རྨི་ལམ་ལོངས་སྤྱོད།།

བརྩེ་ལྡན་མ་ལོའི་སྙིང་གི་སྲོག་དུ་གྲུབ་པའི།།
འབྲོང་གཡག་དར་མའི་རྒྱུད་དུ་འཁྲུངས་བའི་བུ་ཞིག།
འཁོར་བས་བརྙས་བཅོས་ཡང་དང་བསྐྱར་དུ་བྱས་པས།།
སེམས་ཀྱི་འཁུན་སྒྲ་མ་བཟོད་ཕྱི་ལ་ཤོར་སོང་།།